مطلب ارسالی کاربران
نوحه ترکی جدید ایلمه سفر سمت کربلایه قارداش طالع باکویی +متن
مرحوم صرّاف تبریزی
.
ایلمه سفر سمت کربلایه قارداش
سالما باجیوی محنت بلایه قارداش
قویمارام سنی عراقه
یوخدی طاقتیم فراقه
.
.
سندن ئوزگه یوخدی بیر نفر پناهیم
گیتمه گیتسن اوج ایدر سمایه آهیم
قیل ترحّم ای منیم امیدگاهیم
گیتمه گللم مثل نی نوایه قارداش
.
.
درد الینده قامتیم دونوب هلاله
چون هلال ماه غم باتیب ملاله
قویما حسرت بو مریضه نی وصاله
سالما هجران طرحینی آرایه قارداش
.
.
سن گیدرسن نیله سین بو بخت قاره
مرغ روحیم چیخسا جسمیدن کناره
سویله قارداش کیم منی قویار مزاره
کیم اوخور بس قبریم اوسته آیه قارداش
.
.
نه انام واردیر منه مواظب اولسون
نه باجیم وار منله بیر مصاحب اولسون
کیمدی من تک جام مرگه طالب اولسون
نوش قیلسین ایتمه سین گلایه قارداش
.
.
ایندی بیلدیم وار سکینه نین آناسی
او گییب دیر اگنینه سفر لباسی
من یتیمه قوی چکیم فلک جفاسی
همدم اولسون هر آنا بالایه قارداش
.
.
قیل نظاره گول یوزومده رنگ زرده
سالما درد هجریلن دوباره درده
قوی منیم ده سالسین ای علی سفرده
سرو قدین باشیم اوسته سایه قارداش
.
.
ایندی کی یالقیز منی قویوب گیدیرسن
جانیمی پیکان هجره توش ایدیرسن
سن گلینجه ئولسه گر باجون نئدیرسن
مایل اولما بیر بئله جفایه قارداش
.
.
بو عزای شاه کربلاده یکسر
آغلا «صرّاف» ایله ناله چون سمندر
دم به دم صغرا دیلینجه ده مکرر
گیتمه گللم مثل نی نوایه قارداش
.
.
#خروج_مدینه #صراف_تبریزی
#ایلمه_سفر_سمت_کربلایه_قارداش
