مطلب ارسالی کاربران
زبان حالی از حضرت زهرا سلام الله علیها خطاب به امیر مومنان حضرت علی علیه السلام
گَل اتاقی بیر خلوت ایلیاق تنگه گَلدی سینم عم اوغلی جان
آغلیاق حسینیله زینبه بیر دویونجا باھم عم اوغلی جان
گَل اتاقی بیر خلوت ایلیاق تنگه گَلدی سینم عم اوغلی جان
آغلیاق حسینیله زینبه بیر دویونجا باھم عم اوغلی جان
دوقّوز ایلدی بو ایوده لطفیوین سایه سینده من دالدالانموشام
جان دیوب سنه جان ایشیتمیشم سن یانان مصیبتده یانموشام
ھر گئجه حسینیم سو ایستیوب فضّه دن قاباق من اویانموشام
یوز گوزین اوپوب استراحتین ایتمیشم فراھم عم اوغلی جان
خاطر شریفون بو سوزلرین خاطرینه ناراحت اولماسون
زینبین اوزوم زلفینی یودوم فضّیه دیدوم زحمت اولماسون
اوز وظیفمه ایتموشم عمل خدمتیم سنه منّت اولماسون
بو دله گَلن سوزلریمده وار آیری سر مبھم عم اوغلی جان
نه بو ایوده کی خدمته گوره جان ویرن زمان اجرت ایستورم
نه حسین نه کلثوم و زینبیه ویردیقیم سوده قیمت ایستورم
بو سینمده کی قان اولان سودین خاطرینه حلّیتّ ایستورم
سن منی حلال ایله تا ایدوم جان نثار مقدم عم اوغلی جان
دردمند اوشاقلاریمی چاغور شرح درد ھجران ایدوم گیدوم
صبری تاپشوروم غم چکنلره درد اَلیله درمان ایدوم گیدوم
ویر حسینیمی بیرده سینمه، جان حسینه قربان ایدوم گیدوم
واضح اولسون آخِر وداعیده ابتدای ماتم عم اوغلی جان
گون باتاندا سعی ایله بو ایوه ظلمت دجی سایه سالماسون
آخشام اولجاقین بو یتیملر خاطرین غبار غم آلماسون
سن اوزون چراغ یاندور ھر گئجه زینبیم قرانلوقدا قالماسون
زینب اوخشاسا منده آغلارام قبر ایچینده ھردم عم اوغلی جان
قلبی تیز سنار لحظه الفتین بیر نفر کسنده حسینیلن
قویما سنده بیر لحظه آیریلا قارداشی حسنده حسینیلن
بیر زمان ھله آیری گَزمیون مجتباده، سنده حسینیلن
سن یتیملر دادخواھی سن ای پناه عالم عم اوغلی جان
دست چشم بند قضائیلن سن که یانمالیدون فراقیمه
کاش او گون اُلِیدیم که ووردولار یاره قلب پر اشتیاقیمه
آستانه ده دفن ایدوب منی محسنی ویر یِدون قوجاقیمه
قبر اولیدی دلسیز شھیدیمه بو یارالی سینم عم اوغلی جان
یاندی ظلم ثانیدن ای عجب آستانه ی وحی لم یزل
باغلادی سنون قولّارون فلک، دشمنون منه قویمادی محل
قائد شریعت عیالینه اوز ایوینده آخِر آچیلدی اَل
بوسه گاه جِبریله ووردولار پشت پای محکم عم اوغلی جان
دفن و کفنیمون قیل تدارکین نصف شبده ویر غسلیمی اوزون
کوینگیم چخارتما یارالیم فاش اولونماسون سر یّ بو سوزین
آی اگر ایشیق سالسا سینمه نالوی بلند ایتمه، یوم گوزوم
بیرده بیر گیچن حادثاتی سن ایلمه مجسّم عم اوغلی جان
مرحوم استاد منزوی اردبیلی
